မော်လမြိုင်(ဧပြီ-၁၉)။ ။မွန်ပြည်သစ်ပါတီမှ ခရိုင်ကော်မီတီဝင်အဆင့်ရှိ နိုင်မင်းနောင် ယမန်နေ့ညနေပိုင်း(၄) နာရီခန့်တွင် မော်လမြိုင်-မုဒုံမော်တော်ကားလမ်းမပေါ် ရိုးဂိုးကျေးရွာအနီးတွင် သေနတ်ဒဏ်ရာဖြင့် သေဆုံးနေသည်ကို ရဲစခန်းအကြောင်းကြားချက်အရ သိရကြောင်း မွန်ပြည်သစ်အရာရှိများ ပြောပြချက်အရ သိရသည်။
နိုင်မင်းနောင်(ခေါ်) ဒေါက်တာမင်းနောင် BVS သည် ရုံးတာဝန်အရ မော်လမြိုင်မြို့ရှိ ဘဏ်တခုတွင်ငွေထုတ်အပြီး မုဒုံမြို့နယ်၊ ကမာဝက်ရွာနေအိမ်သို့ တစ်ဦးတည်း မော်တော်ဆိုင်ကယ်စီး၍ ပြန်လာစဉ် နောက်ကျောမှ 9-MM ပစ္စတိုဖြင့်တစ်ချက် အပစ်ခံရသည်ဟု ဆိုသည်။
မွန်ပြည်သစ်ပါတီအတွက် ဆန်ရိက္ခာဝယ်ယူရန် ဘဏ်မှငွေထုတ်ခဲ့ခြင်းဖြစ်သည်။ ယင်းမြန်မာငွေကျပ် သိန်း(၁၈၀) ကျော်ကို ပစ်ခတ်သူများမယူဆောင်ခဲ့ပေ။ လောလောဆယ်တွင် အဆိုပါငွေများကို မွန်ပြည်နယ်ရဲမှ သိမ်းဆီးထားသည်။
ငွေများကို သေနတ်သမားများမယူဆောင်ခဲ့သည်မှာ သူကိုတမင်လုပ်ကြံခြင်းသာ ဖြစ်သည်ဟုမွန်ပြည်သစ် အသိုင်းအဝိုင်းတို့မှ ယူဆနေကြသည်။
သူ၏ရုပ်အလောင်းကို မော်လမြိုင်မြို့ ပြည်နယ်ဆေးရုံသို့ယူဆောင်သွားပြီး သက်ဆိုင်ရာမှ ဆေးစစ်မှတ်တမ်းပြုလုပ်ခဲ့သည်။ ယနေ့တွင်လမြိုင်မြို့တွင် သူ၏ရုပ်အလောင်းကို မီးသဂြိုလ်မည်ဟု သိရသည်။
ယခုအခင်းဖြစ်ပွားရာနေရာသည် မော်လမြိုင်မြို့အဝင် အလွန်နာမည်ကြီးသည့် “ရိုးဂိုး” အဖွဲ့ပေါင်းစုံ ဆန်းစစ်ဂိတ်ကြီးနှင့် (၃)ဖာလုံခန့်သာဝေးကွာပြီး မော်တော်ယဉ်အသွားအလာများသည့် မော်လမြိုင်-ရေး-ထားဝယ် မော်တော်ကားလမ်းမကြီး၏ တစ်ခုတည်းသော ပင်မလမ်းကြောင်းကြီး ပေါ်တွင် ဖြစ်သည်။
၁၉၉၅-ခုနှစ် မွန်ပြည်သစ်ပါတီနှင့် စစ်အစိုးရတို့ အပစ်ရပ်ပြီးနောက်ပိုင်း မြို့ပေါ်ဒေသများတွင် မွန်ပြည်သစ်ပါတီဝင်အပေါ် ပထမဆုံးအကြိမ် ဖြစ်ပေါ်ခဲ့သောလုပ်ကြံမှုဖြစ်သည်။ မြို့ပေါ်ဒေသများတွင် ထိပ်ပိုင်းမွန်ပြည်ပါတီဝင် ခေါင်းဆောင်အချို့၏သီးသန့်လုံခြုံရေးမှလွဲ၍ အခြားပါတီဝင်များ မည်သည့်လက်နက်မှ ကိုင်ဆောင်ခွင့်မရှိကြပေ။
သို့သော် အခြားငြိမ်းချမ်းရေးအဖွဲ့များမှာမူ မော်လမြိုင်မြို့ပေါ်တွင် ပစ္စတိုကဲ့သို့သော လက်နက်ငယ်များ ကိုင်ဆောင်နေသည်ကို ဒေသခံများမြင်တွေ့နေရ၏။
မှတ်ချက်။ ။ဤသတင်းကို ကိုဗညားအောင် (ကဵဝဵ) မှရရှိသည်။
0 comments:
Post a Comment